برطانوی کورونا ویکسین کا پاکستان میں استعمال ، عوام کیلئے حوصلہ افزا خبر آگئی
اسلام آباد : آسٹرازنیکا نے کورونا ویکسین پاکستان لانے کی اجازت مانگتے ہوئے پاکستانی فارما کمپنی کے ذریعے ڈریپ کو رجسٹریشن کی درخواست دے دی، رجسٹریشن کے بعد آسٹرازنیکا ویکسین پاکستان میں استعمال ہو سکے گی۔
تفصیلات کے مطابق چینی ویکسین کے بعد برطانوی کورونا ویکسین پاکستان لانے کی تیاریاں جاری ہے ، آسٹرازنیکا نے کورونا ویکسین پاکستان لانے کی اجازت مانگ لی، آسٹرازنیکا کورونا ویکسین کے پاکستان میں ہنگامی استعمال کی اجازت طلب کی ہے۔
ذرائع وزارت صحت کا کہنا ہے کہ آسٹرازنیکا نے پاکستانی فارما کمپنی کے ذریعے ڈریپ کورجسٹریشن کی درخواست دی ، فارما کمپنی نے آسٹرازنیکا کی ویکسین کے کلینیکل ٹرائلز کا ڈیٹا جمع کرا دیا ہے ، ڈریپ رجسٹریشن بورڈ رواں اجلاس میں آسٹرازنیکا ویکسین رجسٹرڈ کرے گا، ڈریپ رجسٹریشن بورڈ کا اجلاس 15جنوری تک جاری رہےگا۔
ذرائع کے مطابق رجسٹریشن بورڈ آسٹرازنیکا ویکسین کے ہنگامی استعمال کی منظوری دےگا، رجسٹریشن کے بعد آسٹرازنیکا ویکسین پاکستان میں استعمال ہو سکے گی۔
آسٹرازنیکا برطانیہ اور سویڈن کی مشترکہ ملٹی نیشنل فارما کمپنی ہے، آسٹرازنیکا کی کورونا ویکسین تمام عمر کے افراد کیلئے موثر پائی گئی ہے ، آسٹرازنیکا برٹش میڈیسن و ہیلتھ کیئرپراڈکٹس ریگولیٹری ایجنسی سےمنظورشدہ ہے اور اس کی کورونا ویکسین کو گھریلو فریج میں بھی محفوظ رکھا جا سکتا ہے۔