کورونا ویکسین : برطانوی یونیورسٹی نے وبا کے خاتمے کی امید دلادی
لندن : کیمبرج یونیورسٹی کی جانب سے بنائی گئی کورونا وائرس کی ویکسین کے لیے کلینکل ٹرائلز کا آغاز جلد کیا جائے گا، اس سلسلے میں برطانوی حکومت نے خصوصی فنڈ بھی جاری کیا ہے۔
تفصیلات کے مطابق یونیورسٹی آف کیمبرج رواں برس کے آخر تک کورونا وائرس کی ویکسین کے لیے کلینکل ٹرائلز کا آغاز کرے گی، اس حوالے سے یونیورسٹی انتظامیہ کا کہنا ہے کہ برطانوی حکومت نے اس پروجیکٹ کے لیے ایک اعشاریہ نو ملین پونڈز بطور فنڈ اجراء کیا ہے۔
یونیورسٹی کی جانب سے جاری کردہ بیان کے مطابق کیمبرج یونیورسٹی نے کورونا وائرس کے لیے ویکسین تیار کر دی ہے اور رواں برس کے آخر یا آئندہ برس کے اوائل میں اس کا کلینکل ٹرائلز کا آغاز کیا جائے گا۔
یونیورسٹی نے حکومت برطانیہ کا شکریہ ادا کرتے ہوئے بتایا کہ حکومت نے اس مشن کی تکمیل کے لیے انہیں ایک اعشاریہ نو ملین پونڈز کی رقم فراہم کی تھی۔
یونیورسٹی انتظامیہ کے بیان کے مطابق اگر یہ تجربہ کامیاب رہا تو اس سے بہت زیادہ فائدہ ہو گا اور اس ویکسین کو کم لاگت سے تیار اور مارکیٹ میں باآسانی فروخت جاسکے گا۔
بیان میں مزید کہا گیا ہے کہ بالآخر ہمارا مقصد ایک ایسی ویکسین بنانا ہے جو نہ صرف ایس اے آر ایس کوویڈ ٹو سے محفوظ رکھ سکے گا بلکہ جانوروں سے انسانوں میں پھیلنے والی وائرس کے لیے بھی فائدہ مند ثابت ہوگا۔