سید شجاعت بخاری شہید کشمیریوں کی توانا آواز تھے،راجہ فاروق حیدر خان

مظفر آباد ۔ (۔ 15 جون2020ء) آزادجموں و کشمیر کے وزیراعظم راجہ محمد فاروق حیدر خان نے کہا ہے کہ سید شجاعت بخاری شہید کشمیریوں کی توانا آواز تھے۔بھارتی فوج نے انہیں شہید کر کے ریاست کو اسکے انتہائی ذہین بیٹے سے محروم کر دیا۔وزیراعظم نے ان خیالات کا اظہار شجاعت بخاری شہید کی دوسری برسی کے موقع پر کیا۔راجہ محمد فاروق حیدر خان نے کہا کہ رائزنگ کشمیر کے چیف ایڈیٹر کے طور پر ان کا قلمی جہاد تمام ریاستی اخبارات کیلئے مشعل راہ ہے۔انہوں نے کہا کہ دھرتی ایسے بیٹے کم ہی پیدا کرتی ہے جو اسکا فخر بن جاتے ہیں۔وزیراعظم نے کہا کہ شجاعت بخاری کو خاص اس دن نشانہ بنایا گیا جب اقوام متحدہ کے انسانی حقوق کمیشن کی مقبوضہ کشمیر کی صورتحال پر رپورٹ آئی تھی جس میں شجاعت بخاری اور دیگر دوستوں کا بڑا کنٹریبویشن تھا۔

انہوں نے کہا کہ سید شجاعت بخاری کی صحافتی خدمات اور خاص طور پر ریاست کے دونوں جانب کے صحافیوں کو اکٹھا کرنے کی ان کی کوششیں ہمیشہ یاد رکھی جائیں گی۔ انہوں نے جب بھی آزادکشمیر کا دورہ کیا وہ ریاستی اخبارات اور قومی اخبارات کے ساتھ خصوصی انٹیرکشن کرتے تھے جس کے دوران وہ کشمیری عوام کے حق خودارادیت کی تحریک کو مختلف پہلووں سے اجاگر کرتے تھے۔انہوں نے کہا بھارتی فوج اور اسکے کارندوں نے انہیں اسوقت نشانہ بنایا جب وہ اپنے اخبار کے دفتر سے باہر نکل کر گھر جا رہے تھے۔وزیراعظم نے ان کی خدمات کو شاندار الفاظ میں خراج عقیدت پیش کیا اور اس عزم کا اعادہ کیا کہ بخاری شہید کا مشن جو مقبوضہ کشمیر کی بھارتی غلامی سے آزادی تھا ہر حال میں پورا کیا جائے گا۔