وزیر خارجہ بلاول بھٹو زرداری کے بیان کو تشدد کے خطرے سے جوڑنا انتہائی غیر ذمہ دارانہ ہے:دفتر خارجہ
اسلام آباد07مئی(کے پی این) دفتر خارجہ نے کہا ہے کہ وزیر خارجہ بلاول بھٹو زرداری کے بیان کو تشدد کے خطرے سے جوڑنا نہ صرف ایک شرارت بلکہ انتہائی غیر ذمہ دارانہ ہے۔
دفتر خارجہ کی ترجمان نے اتوار کوجاری کئے گئے ایک بیان میں کہاکہ یہ اقدام وزیر خارجہ کی جانب سے مذاکرات کے ذریعے تنازعات کے حل کے کلیدی پیغام سے توجہ ہٹانے کی ایک کوشش ہے۔ وزیر خارجہ نے بھارت کے اپنے حالیہ دورے کے دوران متعدد عوامی اعلانات میں تنازعہ جموںو کشمیر کے پرامن حل کے لیے اقوام متحدہ کی سلامتی کونسل کی متعلقہ قراردادوں کی اہمیت پر زور دیا۔ ایک ویڈیو کلپ کا حوالہ دیتے ہوئے جس میں کہا گیا تھا کہ پاکستان کے وزیر خارجہ نے مقبوضہ جموں وکشمیر میں گروپ 20کے اجلاس کے انعقاد پر بھارت کو دھمکی دی ہے، دفتر خارجہ کی ترجمان نے کہا کہ وزیر خارجہ نے بھارت کے اپنے حالیہ دورے کے دوران متعدد عوامی اعلانات میں تنازعہ جموں وکشمیر کے پرامن حل کے لیے اقوام متحدہ کی سلامتی کونسل کی متعلقہ قراردادوں کی اہمیت پر زور دیا اورواضح طورپر اپنا مقدمہ بین الاقوامی قانون کے مطابق پیش کیا۔ دفتر خارجہ پہلے ہی 11اپریل 2023کے بیان میں مقبوضہ جموں و کشمیرمیں جی 20کے ٹورازم ورکنگ گروپ کے اجلاس کے انعقاد پر پاکستان کے موقف کو واضح کر چکاہے۔انہوں نے کہاکہ وزیر خارجہ کے بیان کو تشدد کے خطرے سے جوڑنا نہ صرف شرارت بلکہ انتہائی غیر ذمہ دارانہ ہے۔ یہ بات چیت کے ذریعے اور بین الاقوامی قانون اور اقوام متحدہ کی سلامتی کونسل کی قراردادوں کے مطابق تنازعات کے حل کے وزیر خارجہ کے اہم پیغام سے توجہ ہٹانے کی کوشش ہے۔بیان میں کہاگیاکہ حساس بین الریاستی معاملات پر رپورٹنگ کرتے وقت صحافتی اصولوں کا احترام کیا جانا چاہیے۔