سیف علی کی بہن صبا علی خان کی تصویر پر بھارتیوں کے نامناسب کمنٹس

بولی وڈ کے چھوٹے خان سیف علی کی بڑی بہن صبا علی خان نے حال ہی میں انسٹاگرام پر اپنے خاندان کے بچوں کی تصویر شیئر کی تو تنگ نظر بھارتی افراد نے ان کے لیے نامناسب کمنٹس کر ڈالے۔

’ٹائمز آف انڈیا‘ کے مطابق صبا علی خان نے 28 ستمبرکو انسٹاگرام پر بھتیجے تیمور علی خان اور بھانجی انایا کھیمو کی تصویر اور ویڈیو شیئر کرتے ہوئے لوگوں سے پوچھا کہ بتائیں ایک دن بعد کون چار سال کا ہوجائے گا؟

اداکار کی بہن کی جانب سے مذکورہ ویڈیو شیئر کیے جانے کے بعد جہاں کئی لوگوں نے درست جواب دیا اور لکھا کہ 29 ستمبر کو ان کی بہن سوہا علی خان کی بیٹی انایا کھیمو 4 سال کی ہوجائیں گی۔

وہیں بعض تنگ نظر افراد نے ان کی پوسٹ پر نامناسب کمنٹس کرتے ہوئے انہیں طعنہ دیا کہ کہیں انہیں دیکھ کر خاندان کے دیگر لوگ پریشان تونہیں ہوجاتے؟

اسی حوالے سے ’انڈیا ٹوڈے‘ نے بتایا ک ایک شخص نے صبا علی خان کی پوسٹ پر کمنٹ کیا کہ انہیں دیکھ کر خاندان کے باقی لوگ ڈر تو نہیں جاتے؟ جس پر اداکار کی بہن نے بھی کرارا جواب دیا اور لکھا کہ ’کمنٹ کرنے والے شخص کو اس پر پریشان نہیں ہونا چاہیے‘۔

ٹائمز آف انڈیا کے مطابق صبا علی خان کی پوسٹ پر بعض دیگر افراد نے بھی نامناسب کمنٹس کرتے ہوئے انہیں خاندان سے الگ قرار دیا اور لکھا کہ شاید ان سے خاندان کے دیگر لوگ دور رہنا پسند کرتے ہوں گے۔

یہ پہلا موقع نہیں ہے کہ صبا علی خان کی تصویر پر لوگوں نے نامناسب کمنٹس کرتے ہوئے انہیں خاندان کے دیگر افراد کے لیے دل آزاری کا سبب قرار دیا ہو بلکہ تنگ نظر لوگ ان کی تصاویر اور ویڈیوز پر پہلے بھی اس طرح کے کمنٹس کرتے رہتے ہیں۔

عام طور پر صبا علی خان کی پوسٹس اور تصاویر پر وہی لوگ نامناسب کمنٹس کرتے ہیں جنہیں اچانک معلوم ہوتا ہے کہ وہ اداکار سیف علی خان اور سوہا علی خان کی بہن جب کہ شرمیلا ٹیگور کی بیٹی ہیں۔

صبا علی خان اداکارہ شرمیلا ٹیگور کی بڑی بیٹی اور سیف علی خان کی بڑی بہن ہیں جب کہ سوہا علی خان ان سے چھوٹی ہیں۔

بھائی اور بہن کے برعکس صبا علی خان نے شوبز کے بجائے جیولری اور ریئل اسٹیٹ کے کاروبار کا انتخاب کیا اور وہ میڈیا سے دور رہتی ہیں، تاہم وہ انسٹاگرام پر اہل خانہ کی تصاویر اور ویڈیوز شیئر کرتی رہتی ہیں۔

شوبز کی دنیا سے دور اور خاندان کے باقی دیگر افراد سے مختلف نظر آنے کی وجہ سے لوگ صبا علی خان کے لیے نامناسب اور توہین آموز کمنٹس کرتے رہتے ہیں، تاہم وہ بھی تنگ نظر لوگوں کو فوری طور پر کرارا جواب دیتی رہتی ہیں۔

صبا علی خان بھائی سیف اور بھابھی کرینہ کپور سمیت بہنوئی اداکار کنال کھیمو اور بہن سوہا علی خان کے ساتھ بھی تصاویر شیئر کرتی رہتی ہیں۔