کشمیری جدوجہد آزادی میں تنہا نہیں بلکہ پورا پاکستان ان کے شانہ بشانہ کھڑا ہے‘ رپورٹ

سرینگر کشمیریوں کی جدوجہد آزادی کی طرف عالمی برادری کے ساتھ ساتھ انسانی حقوق کی عالمی تنظیموں کی توجہ بھی مبذول ہونا شروع ہوگئی ہے۔کشمیر میڈیا سروس کی طرف سے آج جاری کی گئی ایک تجزیاتی رپورٹ میں کہا گیا ہے کہ غیر قانونی طورپر بھار ت کے زیر قبضہ جموںوکشمیر میں بھارتی مظالم پر نہ صرف پاکستان بلکہ عالمی برادری نے بھی اپنی ناراضی ظاہر کرنا شروع کردی ہے جو اس حقیقت کی گواہی ہے کہ مقبوضہ کشمیر میں انسانیت کے خلاف جرائم کی وجہ سے دنیا کا سب سے بڑا جمہوری ملک ہونے کابھارتی نعرہ بھی اب دنیا پر اثر انداز نہیں ہو رہا ہے۔اس کے برعکس دنیا بھر کے تمام آزادی پسند لوگ جدوجہدآزادی میں مصروف کشمیریوں کے ساتھ مضبوطی سے کھڑے ہیں۔رپورٹ میںکہا گیا ہے کہ بی جے پی کی زیر قیادت بھارتی حکومت کی طرف سے گزشتہ سال 5 اگست کو مقبوضہ جموںوکشمیر کی خصوصی حیثیت کے خاتمے کے لئے غیر قانونی اقدامات کے بعد عالمی سطح پر کشمیر کے حوالے سے بھارتی پالیسی میں ایک بڑی تبدیلی دیکھی گئی ہے ۔

بھارت کے اس اقدام کی پوری دنیا میں مذمت کی گئی۔رپورٹ میں کہا گیا ہے کہ گزشتہ سال دفعہ 370 کی منسوخی سے عالمی توجہ کشمیریوں کی حالت زار کی طرف مبذول ہوگئی اور عالمی انسانی حقوق کے کارکن خاص طور پردنیا بھر میں کشمیریوں کے ساتھ اظہار یکجہتی کر رہے ہیں ۔رپورٹ میں کہا گیا ہے کہ کشمیری عوام اپنی بے مثال قربانیوں اور بھارتی قبضے کے خلاف اپنے عزم کی بدولت جلد ہی فاتح بن کر ابھریں گے اور بھارتی ظلم و بربریت سے آزادی حاصل کرکے رہیں گے۔ رپورٹ میںکہا گیا کہ کشمیری عوام خوش قسمت ہیں کہ وہ حق خودارادیت کی جدوجہد میں تنہا نہیں بلکہ پورا پاکستان آزادی کے حصول میں ان کے شانہ بشانہ کھڑا ہے۔