عمران خان ہی پاکستان کی آخری امید ہیں، بہروز سبزواری

کراچی: پاکستان ڈراما انڈسٹری کے سینئر اداکار بہروز سبزواری نے وزیراعظم عمران خان کو پاکستان کی آخری امید قرار دے دیا۔

اداکار بہروز سبزواری پاکستان مسلم لیگ (ن) کی رہنما حنا پرویز بٹ کے ہمراہ نجی ٹی وی چینل کے شو ’’جشن کرکٹ‘‘ میں شریک ہوئے جہاں انہوں نے میزبان کے سوالوں کے دلچسپ جوابات دئیے۔

دوران گفتگو بہروز سبزواری نے ٹی وی اور ریڈیو دونوں کو مشکل میڈیم قراردیتے ہوئے کہا کہ ان کے خاندان میں جتنے بھی اداکار ہیں ان میں سب سے بہترین جاوید شیخ ہیں کیونکہ ان کا کوئی مقابلہ نہیں ہے۔

بہروز سبزواری نے اپنے بیٹے شہروز سبزواری کے بارے میں پوچھے گئے سوال کا جواب دیا کہ شہروز کی کامیابی میں ان کا بیٹا ہونے سے زیادہ اس کی خود کی صلاحیتوں اور محنت کا عمل دخل رہا ہے۔

میزبان نے اداکار سے سوال پوچھا کہ آپ ایم کیو ایم کے بہت بڑے سپورٹر تھے لیکن اب آپ نے توبہ کرلی ہے کیا یہ درست ہے؟ اس سوال کے جواب میں بہروز سبزواری نے کہا میں کبھی بھی ایم کیو ایم کا سپورٹر نہیں تھا اور نہ ہی میں نے ابھی توبہ کی ہے۔ جو سچ ہے، جو صحیح لوگ ہیں میں ان کے ساتھ ہمیشہ رہوں گا۔ میں بھی پاکستانی ہوں اس مٹی نے اللہ کے بعد مجھے سب کچھ دیا ہے۔

میزبان نے بہروز سبزواری سے سوال پوچھا اب عمران خان اس ملک کی آخری امید ہیں اس بارے میں آپ کا کیا کہنا ہے؟ بہروز سبزواری نے جواب دیا مجھے ایسا ہی لگتا ہے۔ تاہم ان کے برابر میں موجود حنا پرویز بٹ نے کہا نواز شریف اس ملک کی  اورعوام کی آخری امید ہیں۔

حنا پرویز بٹ کی اس بات پر بہروز سبزواری نے کہا میری دعا ہے کہ نواز شریف صاحب خیر سے واپس آئیں تو چوتھی دفعہ وزیراعظم بنیں۔ حنا پرویز بٹ نے کہا وہ بہت جلد واپس آئیں گے اور چوتھی دفعہ وزیراعظم بنیں گے۔

میزبان نے سوال پوچھا پاکستان تحریک انصاف کی حکومت نااہل ضرور ہے لیکن کرپٹ نہیں ہے؟ اس سوال کے جواب میں بہروز سبزواری نے کہا نہیں میں یہ نہیں کہہ سکتا کیونکہ حکومت میں ہر قسم کے لوگ ہوتے ہیں اور ہمیشہ ہوتے رہے ہیں یہ کوئی نئی بات نہیں ہے۔ کرپشن ہماری نس نس میں سرائیت کرگئی ہے لیکن لیڈر سچا ہے۔

عمران خان کو چاہئے کہ اپوزیشن کو بھولیں اور کارکردگی پر توجہ دیں اس سوال پر بہروز سبزواری نے کہا انہیں لگتا ہے کہ عمران خان کو دونوں چیزوں کو دیکھنا چاہئے۔

میزبان نے اداکار سے سوال کیا جب تک پیپلز پارٹی سے چھٹکارہ نہیں ملتا تب تک کراچی کا کچھ نہیں ہوسکتا اس بارے میں آپ کی کیارائے ہے؟ بہروز سبزواری نے کہا اس میں کوئی شک نہیں کہ  پیپلز پارٹی نے بھی کراچی میں بہت سے کام کیے ہیں۔ میرے حساب سے بہت سی چیزیں رہ گئی ہیں جو وہ نہیں کرسکے۔