منی بجٹ کی منظوری روکنے کیلیے متحدہ اپوزیشن کا اہم اجلاس آج ہوگا
اسلام آباد: منی بجٹ کی قومی اسمبلی سے منظوری روکنے کے لیے متحدہ اپوزیشن کا اہم اجلاس آج شہباز شریف کی زیر صدارت ہوگا۔
پاکستان مسلم لیگ (ن) کی ترجمان مریم اورنگزیب نے پارلیمنٹ میں متحدہ اپوزیشن کے اجلاس سے متعلق بیان دیتے ہوئے کہا ہے کہ پارلیمنٹ میں متحدہ اپوزیشن کا اہم اجلاس آج ہوگا، پاکستان مسلم لیگ (ن) کے صدر اور قائد حزب اختلاف شہباز شریف اجلاس کی صدارت کریں گے۔
مریم اورنگزیب کے مطابق اجلاس پارلیمنٹ ہاﺅس میں اپوزیشن لیڈر کے چیمبر میں سہ پہر 3 بجے ہوگا جس میں پاکستان پیپلز پارٹی کے چئیرمین بلاول بھٹو زرداری سمیت پارلیمنٹ میں متحدہ اپوزیشن کے پارلیمانی قائدین، متحدہ اپوزیشن کے اراکین پارلیمان، سینئر قائدین اور رہنما شریک ہوں گے۔
مریم اورنگزیب نے مزید بتایا کہ اجلاس میں فنانس بل، فارن فنڈنگ کیس سمیت دیگر اہم امور پر مشاورت ہوگی ساتھ ہی قومی اسمبلی میں منی بجٹ کو منظوری سے روکنے کے لیے حکمت عملی پر غور ہوگا۔