ٹوئٹر نے اپنے صارفین کو لاکھوں روپے کمانے کا طریقہ بتا دیا

لاہور:(ویب ڈیسک)سماجی رابطےکی ویب سائٹ ٹوئٹر نے صارفین کو لاکھوں روپے کمانے کا طریقہ بتا دیا ہے۔

غیر ملکی میڈیا رپورٹس کے مطابق ٹوئٹر نے اپنے مونیٹائزیشن پروگرام کے تحت ایک نیا آپشن متعارف کروایا ہے ،اس آپشن کے ذریعے صارفین ’’ٹوئٹر سپیسز‘‘ پر ٹکٹ لگا کر کمائی کرسکتے ہیں۔

واضح رہے کہ مختلف سوشل میڈیا پلیٹ فارمز اور سٹریمنگ سائٹس پر یہ سہولت موجود ہے کہ آپ ایک آن لائن پروگرام کی میزبانی کریں اور اسے سننے یا دیکھنے والوں سے اس میں شرکت کا معاوضہ بھی وصول کریں۔ اب اسی میدان میں ٹوئٹر نے بھی اپنا ایک فیچر ’’سپیسز‘‘ (Spaces) استعمال کرتے ہوئے ایک قدم آگے بڑھایا ہے۔

رپورٹس کے مطابق’’سپیسز‘‘ فیچر کے تحت ٹوئٹر پر لائیو آڈیو پروگرام اس طرح سے منعقد کیا جاسکتا ہے کہ اسے صرف چند مخصوص لوگ ہی سن سکیں۔اگر آپ سوشل میڈیا انفلوئنسر ہیں تو اسی ’’سپیسز‘‘ پر ٹکٹ لگا کر پیسہ بھی کما سکتے ہیں۔ اس حوالے سے ٹوئٹر بلاگ کے مطابق ’’سپیسز‘‘ کے ٹکٹ کی مالیت ایک ڈالر سے 999 ڈالر تک رکھی جاسکتی ہے۔

ٹوئٹر بلاگ میں اگرچہ واضح طور پر یہ تو نہیں لکھا کہ ’’ٹکٹڈ سپیسز‘‘ سے کون کونسے ممالک میں سوشل میڈیا انفلوئنسرز استفادہ کرسکتے ہیں لیکن تحریر کے انداز سے ظاہر ہے کہ شاید اس پروگرام کا اجراء ساری دنیا کےلیے ایک ساتھ کردیا گیا ہے۔

یہ پروگرام اینڈرائیڈ فون اور آئی فون، دونوں پر ٹوئٹر ایپس کےلیے ہے جس کے تحت امریکی سوشل میڈیا انفلوئنسرز کو معاوضے کی ادائیگی امریکی قوانین کے مطابق ٹیکس کٹوتی کے بعد کی جائے گی۔