وزیر تعلیم شفقت محمود نے سیاست سے بالاتر ہوکر ملک میں تعلیمی فیصلے کررہے ہیں

اسلام آباد(خصوصی رپورٹر)وزیر تعلیم شفقت محمود نے سیاست سے بالاتر ہوکر ملک میں تعلیمی فیصلے کررہے ہیں، پوری کوشش ہے کہ تعلیمی ادارے گیارہ جنوری سے کھول دیے جائیں، کورونا سے متاثرہ تعلیمی اداروں کے مسائل سے آگاہ ہیں،نجی تعلیمی اداروں کے لئے مالی امداد اور بلا سود قرضوں کی فراہمی کا پیکج تشکیل دے دیاہے جو وزارت خزانہ کی منظوری کے بعد فراہم کیا جائے گا۔ان خیالات کا اظہار انہوں نے گزشتہ وز آل پرائیویٹ اسکولز ایسوسی ایشنز سپریم کونسل کے وفد سے ملاقات کے موقع پر کیا۔ وفد میں چوہدری عبید اللہ،ملک ابرار حسین، حافظ بشارت،افضل بابر، ناصر محمود اور ابرار احمد خان شامل تھے۔وزارت کی طرف سے اس ملاقات میں پارلیمانی سیکرٹری ایجوکیشن وجہیہ اکرم، وفاقی سیکرٹری تعلیم فرح حامد خان، ایڈیشنل سیکرٹری محی الدین احمد وانی اور دیگر سینئر آفیسرز بھی موجود تھے۔اس موقع پربات کرتے ہوئے وفاقی وزیر نے کہا کہ رواں سال تعلیم کے لئے سب سے مشکل سال گزرا۔ تعلیمی اداروں کو بند کرنے کا فیصلہ میرے لئے سب سے زیادہ تکلیف دہ تھا۔ وزرات تعلیم از خود کوئی فیصلہ نہیں لیتی بلکہ وزارت صحت کے ڈیٹا، اور ہدایات کو مدنظر رکھ کر فیصلہ کرنا ہوتا ہے۔ وزیر تعلیم شفقت محمود نے یو کے کرونا وائرس ویری اینٹ جو کہ پاکستان میں رپورٹ ہو چکا ہے کے متعلق بھی آگاہ کیا جسکے پھیلاو کی رفتار نان ویری اینٹ کرونا وائرس سے زیادہ ہے۔ وفاقی وزیر تعلیم نے وفد کو بتایا کہ طلبہ کے کورسز مکمل کرنے کے لئے 4 جنوری کی میٹنگ میں مارچ میں ہونے والے امتحانات آگے لے جانے پر فیصلہ کریں گے۔ صورت حال کو دیکھتے ہوئے گرمیوں کی چھٹیوں کو کم کرنے کا بھی سوچ رکھا ہے۔ تعلیمی سال جو اپریل میں شروع ہوتا ہے کو اگست میں لے جانے پر بھی مشاورت کریں گے۔وفاقی وزیر نے بتایا کہ انہوں نے تمام صوبائی وزرا تعلیم کو 4 جنوری کی بین الصوبائی وزرا تعلیم کانفرنس سے پہلے، اپنے صوبوں کی پرائیویٹ اسکولز ایسوسی ایشنز سے ملاقات کرنے کی درخواست کی ہے اور وہ خود اجلاس میں پرائیویٹ اسکولز ایسوسی ایشنز کی نمائندگی کریں گے انکی پوری کوشش ہوگی جتنا جلدی ممکن ہو تعلیمی ادارے کھول دیئے جائیں اس ضمن میں انشا اللہ اچھی خبر دیں گے۔ وفاقی وزیر نے کہا سیاست اپنی جگہ پر مگر تعلیمی فیصلے ہم متفقہ طور پر کر رہے ہیں۔ وفاقی وزیر تعلیم نے وفد کو اس مشکل گھڑی میں چھوٹے سکولوں کی مدد کے لئے حکومتی اقدامات سے بھی آگاہ کیا اس سلسلے میں وزیر اعظم سے بھی بات کی، انکے لئے مالی امداد اور بلا سود قرضوں کی فراہمی کا پیکج تشکیل دیا جو کہ اسوقت وزارت خزانہ میں ہے۔ وفاقی وزیر تعلیم نے کہا تعلیمی سرگرمیوں کے تعطل کا جتنا احساس اور تکلیف انکو ہے شاید کسی اور کو ہو۔ وہ اور انکی وزارت پورے طور پر انکے ساتھ کھڑی ہے۔ آل پرائیویٹ اسکولز ایسوسی ایشنز کے وفد نے وزیر تعلیم کے تعاون پر ان کا شکریہ ادا کیا۔