گلوکارہ مومنہ مستحسن نے ڈرامہ سیریل الف کی یاد تازہ کر دی

پاکستان میوزک انڈسٹری کی معروف و مقبول گلوکارہ مومنہ مستحسن نے جیو انٹرٹینمنٹ کے مقبول ترین ڈرامہ سیریل ’الف‘ کا ایک سال مکمل ہونے پر الف ڈرامے کا ٹائٹل سانگ گا کر اپنی خوشی کا اظہار کیا ہے۔

باغی ٹی وی : حال ہی میں مشہور ڈرامہ سیریل ’الف‘ کو ایک سال مکمل ہوا ہے تو اس موقع پر نامور گلوکارہ مومنہ مستحسن نے بھی اپنے انداز میں ’الف ‘ کی یاد تازہ کی ہے۔

سوشل میڈیا ویب سائٹ انسٹاگرام پر مومنہ مستحسن نے اپنی ایک ویڈیو شیئر کی ہے جس میں گلوکارہ ڈرامہ سیریل’ الف‘ کا ٹائٹل سانگ گنگنارہی ہیں ہاتھ میں گٹار تھامے مومنہ مستحسن نے ’الف‘ کے گانے کے چند بو ل گنگنائے۔

انسٹاگرام پر ویڈیو پوسٹ کرتے ہوئے مومنہ مستحسن نے لکھا کہ ’الف کو ایک سال مکمل ہوگیا ہے اور مجھے یہ سوچ کر بہت خوشی محسوس ہوتی ہے کہ میں اس پراجیکٹ کا حصہ رہی۔

مومنہ مستحسن نے اپنی پوسٹ کے کیپشن میں ’الف‘ کے مداحوں سے سوال کیا کہ ’آپ لوگوں نے ڈرامہ سیریل الف سے کیا سیکھا؟

مومنہ‌مستحسن کی اس پوسٹ کے جواب میں ثنا شاہنواز نے گلوکارہ کی خوبصورت آواز کی تعریف کی اور کہا کہ وہ کود کو خوش قسمت تصور کرتی ہیں کہ وہ الف جیسے عظیم پروجیکٹ کا حصہ بنیں-

گلوکارہ کے سوال پر مداحوں نے جواب دیتے ہوئے کہا کہ اس ڈرامے میں اللہ اور اُس کے بندے کی محبت کو دِکھایا گیا اور ہم نے سیکھا ہے کہ اللہ ہمیشہ اپنے بندوں کے ساتھ ہوتا اور انسان کو صرف اللہ سے ہی عشق کرنا چاہیے اور اُس کے احکامات پر عمل کرتے ہوئے زندگی گُزارنی چاہیے۔اور اللہ اور اس کے بندے کے بیچ الف کے جیسا سیدھا تعلق ہے-

ڈرامہ سیریل ’الف‘ کی کہانی قلب مومن اور مومنہ سلطان کی زندگی پر مشتمل ہے اس کہانی کو عمیری احمد نے تحریر کیا ہے جبکہ اس کے ہدایتکار ’حسیب حسن‘ ہیں اور پروڈیوسر ثمینہ ہمایوں سعید اور ثنا شاہنواز ہیں اس کے مرکزی کرداروں میں حمزہ علی عباسی، سجل علی، کبریٰ خان، احسن خان، منظر صہبائی، سلیم معراج، لبنیٰ اسلم، عثمان خالد بٹ اور دیگر شامل ہیں۔