چوہدری شوگر مل کیس:مریم نواز کی نیب درخواست جرمانے کے ساتھ خارج کرنے کی استدعا

لاہور : مسلم لیگ ن کی نائب صدر مریم نواز نے چوہدری شوگر مل کیس ضمانت خارج کرنے کی نیب کی درخواست جرمانے کے ساتھ خارج کرنے کی استدعا کر دی۔

تفصیلات کے مطابق چوہدری شوگر مل کیس میں مسلم لیگ ن کی نائب صدر مریم نواز نے نیب کی درخواست پر جواب جمع کرا دیا ، مریم نواز کا جواب 6صفحات پر مشتمل ہے۔

جواب میں مریم نواز نے نیب کی درخواست جرمانے کے ساتھ خارج کرنے کی استدعا کرتے ہوئے کہا ہے کہ نیب نے چوہدری شوگر مل کیس میں 14 ماہ خاموشی اختیار کی پھر طلب کیا، نیب کے کیسز اور گرفتاریاں آواز دبانے کی کوشش ہے جبکہ نیب سیاسی انجینرنگ کا کردار ادا کر رہا ہے۔

مریم نواز نے اپنے جواب میں نیب کی ضمانت منسوخی کی درخواست کی مخالفت کی اور کہا نیب کی درخواست سے بظاہر لگتا ہے کہ چیرمین نیب حکومت کے ترجمان ہیں۔

جواب میں کہا گیا قانون کے مطابق لاہور ہائی کورٹ نے چوہدری شوگر مل میں ان کی ضمانت منظور کی لاہور ہائی کورٹ نے نیب کا موقف سننے کے بعد میرٹ پر ضمانت منظور کی تھی ۔

مریم نواز نے اپنے جواب میں مزید کہا ہے کہ نیب کا کام کرپشن روکنا ہے سیاسی بیانات پر کاروائی کرنا نہیں،حکومتی ایما اور سیاسی بنیادوں پر نیب کارروائی کر رہا ہے۔

خیال رہے نیب نے چوہدری شوگر ملز کیس میں مریم نواز کی ضمانت منسوخی کی درخواست ہاٸی کورٹ میں داٸر کر رکھی ہے، جس پر سماعت سات اپریل کو ہو گی۔