خواجہ فردوس کا مسئلہ کشمیر بارے ڈاکٹر مہاتیر محمد کے موقف کا خیرمقدم
عالمی برادری جنوبی ایشیا میں پائیدار امن و سلامتی کیلئے مسئلہ کشمیر کے حل میں اپنا کردار ادا کرے، حریت رہنما
خواجہ فردوس نے سرینگر سے جاری ایک بیان میں کہا کہ عالمی برادری کو چاہئے کہ وہ وقت کی نزاکت کو سمجھے ہوئے دونوں ہمسایہ ایٹمی طاقتو ں کے درمیان خوفناک تصادم کو روکنے اور جنوبی ایشیا میں پائیدار امن و سلامتی کوفروغ دینے اورخوفناک جنگ سے بچانے کیلئے مسئلہ کشمیر کے حل کیلئے اپنا اہم کردار ادا کرے ۔ انہوں نے کہا کہ جب تک مسئلہ کشمیر کو کشمیری عوام کی امنگوں اور اقوا م متحدہ کی قرار دادوں کے مطابق حل نہیں ہوتا جنوبی ایشیاء میں پائیدار من قائم نہیں ہوسکتا۔خواجہ فردوس نے بھارتی فورسز اور قابض انتظامیہ کی طرف سے نہتے کشمیری نوجوانوں کو ہراساں اور انہیں گرفتارکرنے اور چھاپوںکے دوران مکینوں کو زدو کوب کرنے کی شدید مذمت کی۔انہوںنے کہاکہ کشمیری عوام نے جدوجہد آزادی کشمیر کواسکے منطقی انجام تک جاری رکھنے اور اس سلسلے میں کسی بھی قربانی سے دریغ نہ کرنے کا عزم کر رکھا ہے ۔خواجہ فردوس نے واضح کیاکہ مقبوضہ کشمیر میں بھارت کو اپنا یوم آزادی منانے کا کوئی حق نہیں کیونکہ کشمیر بھارت کا حصہ نہیں اور اس کے مستقبل کا فیصلہ ابھی ہونا باقی ہے۔انہوں نے کہاکہ 15اگست کو بھارت کا یوم آزادی اور 26جنوری کو بھارت کے یوم جمہوریہ قریب آتے ہیں تو بھارت کی غاصب فوج جموںو کشمیر میں نوجوانوں کا قافیہ حیات تنگ کردیتی ہے اور نوجوانوں اور بزرگوں سمیت کشمیریوںپر کالاقانون پبلک سیفٹی ایکٹ لاگو کر کے انہیں نامعلوم مقام پر منتقل کردیاجاتا ہے۔