کل جماعتی حریت کانفرنس کا پاکستان کے نئے نقشے کا خیرمقدم

سرینگر  بھارت کے غیر قانونی زیر تسلط جموںوکشمیر میں کل جماعتی حریت کانفرنس کے جنرل سیکریٹری مولوی بشیر احمدنے پاکستان کی طرف سے منظور کئے گئے نئے نقشے کا خیرمقدم کیا ہے جس میں مقبوضہ جموںوکشمیر کو پاکستان کا حصہ دکھایاگیا ہے ۔ کشمیرمیڈیاسروس کے مطابق حریت کانفرنس کے جنرل سیکرٹری مولوی بشیر احمدنے سرینگر میں میڈیا سے گفتگو کرتے ہوئے کہاکہ پاکستان کے نئے نقشے سے دو قومی نظریہ کی عکاسی اور حقیقت کا اظہار ہوتا ہے ۔انہوںنے کہاکہ تنازعہ جموںوکشمیر ایک تاریخی حقیقت ہے اور وہ پاکستان کا حصہ ہے ۔ انہوںنے کہاکہ جموںوکشمیر کے ایک حصے کو کشمیریوں نے آزاد کرایاتھا جسے آزاد کشمیر کا نام دیا گیا اور متنازعہ علاقے کا ایک حصہ اب بھی بھارت کے غیر قانونی زیر تسلط ہے جس کی آزادی کے لئے کشمیری عوام اپنی حق پر مبنی جدوجہد آزادی جاری رکھے ہوئے ہیں ۔مولوی بشیر احمد نے قائد تحریک سید علی گیلانی کو حکومت پاکستان کی طرف سے نشان پاکستان کا اعزا ز دینے کا خیرمقدم کرتے ہوئے کہاکہ سیدعلی گیلانی کشمیریوںکی دل کی دھڑکن اور آزادی کی تحریک اور آواز ہیں۔

جنرل سیکرٹری نے حکومت پاکستان کی طرف سے کشمیر ہائی وے کو سرینگر ہائی وے کے نام سے منسوب کرنے کو ایک اچھا اقدام قراردیا جس سے مسئلہ کشمیر عالمی سطح پر اجاگر ہو گا اور عالمی برادری کی توجہ اس دیرینہ تنازعہ کی طرف مبذول ہو گی۔ انہوںنے پاکستان کی طر ف سے 5اگست کو یوم استحصال منانے اور حکومت ، عوام اور تمام سیاسی جماعتوں کی طرف سے کشمیریوں کے ساتھ مکمل یکجہتی کے اظہار کا خیرمقدم کرتے ہوئے پاکستان کی حکومت اور عوام کو سلام پیش کیا ہے ۔انہوںنے کہاکہ پاکستان کی حکومت اور عوام کشمیریوںکی اپنے ناقابل تنسیخ حق، حق خود ارادیت کے حصول کی منصفانہ جدوجہد کی سیاسی ، سفارتی اور اخلاقی حمایت جاری رکھے ہوئے ہیں۔